Chesta Storia ha da fernì!...
’A storia ’e nu populo ca penza e parla d’â terra soia, accussì comme nu populo straniero ha deciso, doppe ca s’ha pigliato, c’’a viulenza e cu l’inganno, chella stessa terra e ’a vita d’’a gente pe cchiù ’e cientocinquant’anne.
I’ nun ce credo cchiù a chesta storia scritta ncopp’’e libbre ’e scola, addò se legge d’’a libberazione ’e nu Sud ca nun vuleva essere libberato. E addò se chiammano “brigante” chill’uommene e chelli femmene c’hanno cumbattuto contro all’invasore, pe difendere ’a terra de’ pate e a libertà de’ figlie.
E’ fernuto ’o tiempo de’ buscie.
Chelli buscie ca c’hanno ditto ll’ate, pe s’arrubbà na terra ricca ’e natura, storia, arte e dignità, e chelli buscie ca ce simme ditte nuie, pe putè suffrì cchiù poco e pe nun sentì tutto ’o scuorno ’e na vita passata dint’’a schiavitù.
I’ voglio scrivere n’ata storia e ’a voglio scrivere cu ’a lengua ca parlava ’a gente ’e chesta terra, primma ca ’o sangue e ’e lacreme le chiudessero ’a vocca e fermassero ’o tiempo ’e na storia negata a cchille ca ’a steveno facenno, senza cercà ll’aiuto ’e nisciuno.
I’ voglio cancellà tutte ’e buscie de’ padrune ’e chesta terra avvelenata e ferita a morte. Voglio scrivere, nzieme â gente d’’a terra mia, ’a storia ’e nu populo ca torna a decidere d’’o presente suoio e d’’o futuro d’’e figlie suoie.
’A Storia nosta.
Vincenzo Villarosa
